నెల్లూరు రూరల్ ఎమ్మెల్యే కోటంరెడ్డి శ్రీధర్‌రెడ్డి అరెస్ట్‌ వ్యవహారంపై జనసేన అధినేత పవన్ కళ్యాణ్

ఆంధ్రప్రదేశ్ నెల్లూరు

నెల్లూరు రూరల్ ఎమ్మెల్యే కోటంరెడ్డి శ్రీధర్‌రెడ్డి అరెస్ట్‌ వ్యవహారంపై జనసేన అధినేత పవన్ కళ్యాణ్ స్పందించారు. నెల్లూరు జిల్లాలో ఎంపీడీవో సరళపై ఎమ్మెల్యే కోటంరెడ్డి దాడి చేయడం.. గతంలో కృష్ణాజిల్లా ముసునూరు తహసీల్దార్‌ వనజాక్షిపై దెందులూరు ఎమ్మెల్యే చింతమనేని ప్రభాకర్ తన అనుచరులతో దాడి చేసిన ఘటనను గుర్తుకు తెచ్చిందని పవన్ కళ్యాణ్ తెలిపారు. నాడు వనజాక్షి.. నేడు సరళ.. బాధ్యతాయుతమైన ఉద్యోగాల్లో ఉన్న వీరిద్దరూ ప్రజా ప్రతినిధుల దాప్టీకానికి గురికాక తప్పలేదన్నారు.

విధి నిర్వహణలో వున్న మహిళా ఉద్యోగులపైనే ఇలా తెగబడి దాడులు చేస్తుంటే.. ఇక సగటు మహిళలకు భద్రత ఎక్కడుంటుంది? అని పవన్ కళ్యాణ్ ప్రశ్నించారు. ఈ దాడిని వైఎస్ఆర్సీపీ ఎందుకు ఖండించడం లేదన్న జనసేనాని.. శ్రీధర్‌ రెడ్డిపై తీవ్రమైన చర్యలకు ఎందుకు డిమాండ్‌ చేయడం లేదని నిలదీశారు.
ఎంపీడీవో సరళ పెట్టిన క్రిమినల్‌ కేసును నిర్వీర్యం చేయడం ద్వారా వైఎస్ఆర్సీపీ ప్రభుత్వం ప్రజలకు ఎలాంటి సందేశాన్ని ఇస్తోంది? మా శాసన సభ్యులు దాడులు చేస్తారు.. మీరు భరించండి అనే సంకేతాలిస్తోందా? ప్రజాప్రతినిధులే చట్టాన్ని గౌరవించకపోతే చట్టానికి విలువ ఎక్కడ నుంచి వస్తుంది? అని పవన్ కళ్యాణ్ ప్రశ్నించారు.

‘‘ప్రతిపక్ష నేతలు ప్రజా సమస్యలపై రోడ్డెక్కి నిరసన గళం విప్పితే.. నాన్‌ బెయిలబుల్‌ సెక్షన్ల కింద కేసులు, ఒక్కోసారి 307 వంటి హత్యాయత్నం కేసులు పెట్టి అరెస్టులు చేస్తున్నారు. ఒక మహిళా ఉద్యోగిపైన దాడి చేసిన శాసన సభ్యుడు కోటంరెడ్డి శ్రీధర్‌ రెడ్డిపై బెయిల్‌ సులువుగా ఇచ్చే 448, 427, 506, 290 సెక్షన్ల కింద కేసు నమోదు చేసి.. ఈ కేసును పోలీసుల ద్వారా ప్రభుత్వం నీరు గార్చేసింది.

ఈ సెక్షన్ల కింద నమోదయ్యే కేసులలో స్వల్ప జరిమానా, లేదా నామమాత్రపు శిక్ష విధిస్తారంతే. నిజానికి ప్రభుత్వ అధికారి మీద దాడి చేసిన వారిపై 353, 354 సెక్షన్ల కింద బెయిల్‌ ఇవ్వడానికి వీలు లేని కేసు పెట్టాలి. ఆ పనిని పోలీసులు విస్మరించారు. దీనికి ప్రభుత్వ ఒత్తిడి కారణమని జనసేన భావిస్తోంది. ఇటువంటి దాడులు పునరావృతం కాకుండా చూడవలసిన భాద్యత జగన్‌ రెడ్డి ప్రభుత్వంపై వుంది. కోటంరెడ్డి శ్రీధర్‌ రెడ్డిపై కఠినమైన చర్యలు తీసుకోవాలని జనసేన పార్టీ కోరుతోంద’’ని పవన్ కళ్యాణ్ తెలిపారు.

Leave a Reply

Your email address will not be published. Required fields are marked *