హుజూర్‌నగర్‌ ఉప ఎన్నికల బరిలో తెలుగుదేశం పార్టీ

ఆంధ్రప్రదేశ్ తెలంగాణ

హుజూర్‌నగర్‌ ఉప ఎన్నికల బరిలో దిగడానికి తెలుగుదేశం పార్టీ సిద్ధమైంది. ఉప ఎన్నికల్లో పోటీ చేసే అంశంపై టీడీపీ జాతీయ అధ్యక్షుడు చంద్రబాబు నాయుడు శనివారం (సెప్టెంబర్ 28) ఎన్టీఆర్‌ ట్రస్ట్‌ భవన్‌లో పొలిట్‌ బ్యూరో సభ్యులతో సుదీర్ఘంగా చర్చించారు. అభ్యర్థి పేరును ఆదివారం ఖరారు చేయనున్నారు. తమ పార్టీ అభ్యర్థి సోమవారం నామినేషన్ దాఖలు చేస్తారని పార్టీ సీనియర్‌ నేత రావుల చంద్రశేఖర్‌ రెడ్డి సమావేశం అనంతరం మీడియాకు వెల్లడించారు.

టీడీపీ నుంచి నర్సయ్య గౌడ్, నర్సిరెడ్డి, కిరణ్మయి పేర్లు పరిశీలనలోకి వచ్చినట్లు సమాచారం. బీసీ వర్గానికి చెందిన నర్సయ్య గౌడ్ వైపే సీనియర్ నేతలు మొగ్గు చూపినట్లు తెలుస్తోంది. పార్టీ నేతలకు చంద్రబాబు నాయుడు కీలక సూచనలు చేసినట్లు తెలుస్తోంది. ఒకట్రెండు రోజులు ప్రచారంలోనూ ఆయన పాల్గొననున్నట్లు తెలుస్తోంది.

2018 డిసెంబర్‌లో జరిగిన ఎన్నికల్లో హుజూర్‌నగర్‌ ఎన్నికల్లో టీడీపీ పోటీ చేయలేదు. పొత్తులో భాగంగా ఆ స్థానాన్ని కాంగ్రెస్‌కు వదిలేసింది. ప్రస్తుతం తమ పార్టీ కార్యకర్తలు, నాయకులు కోరిక మేరకు పోటీ చేస్తున్నట్లు రావుల చంద్రశేఖర్ రెడ్డి తెలిపారు. ఉప ఎన్నికను ప్రతిష్ఠాత్మకంగా తీసుకుంటామని చెప్పారు.

‘ఉమ్మడి నల్గొండ జిల్లా టీడీపీకి పెట్టని కోట. పార్టీని వీడిన వారు తెలంగాణలో టీడీపీ బలహీన పడిందని విష ప్రచారం చేస్తున్నారు. మా బలం, బలగం కార్యకర్తలే’ అని రావుల అన్నారు.

హుజూర్‌నగర్ ఉప ఎన్నికల్లో అధికార టీఆర్‌ఎస్ పార్టీ తరఫున సైదిరెడ్డి బరిలోకి దిగుతుండగా.. కాంగ్రెస్‌ తరఫున టీపీసీసీ చీఫ్ ఉత్తమ్‌ కుమార్ రెడ్డి సతీమణి పద్మావతి పోటీ చేస్తున్నారు. అక్టోబర్‌ 21న పోలింగ్‌ జరగనుంది. 24న ఫలితాలు వెలువడతాయి. నామినేషన్ల పర్వం అక్టోబర్ 3తో ముగుస్తుంది.

Leave a Reply

Your email address will not be published. Required fields are marked *